World

Grabitja spektakolare e Luvrit: Arrestohen 2 persona si të dyshuar

by stoy

Dy persona janë arrestuar në lidhje me grabitjen e ndodhur të dielën e kaluar (19 tetor) në muzeun e Luvrit në Paris, ku një grup i përbërë nga katër burra vodhi bizhuteri mbretërore me vlerë rreth 88 milionë euro (76 milionë paund), sipas medieve franceze.

 

Prokuroria e Parisit konfirmoi të dielën se një burrë ishte ndaluar nga njësia e Krimit të Organizuar rreth orës 22:00 të mbrëmjes së 25 tetorit në aeroportin “Charles de Gaulle” në Paris, por nuk dha detaje për numrin e saktë të arrestimeve.

 

Prokurorja Laure Beccuau tha në një deklaratë:

“Më vjen keq për rrjedhjen e parakohshme të informacionit.  Kjo mund të pengojë punën e mbi 100 hetuesve të angazhuar për të rikuperuar bizhuteritë e vjedhura dhe për të kapur të gjithë autorët”.

 

 

Ajo theksoi se ishte ende herët për të dhënë më shumë detaje, por do të bënte një deklaratë të re sapo të përfundonte periudha e ndalimit para ngritjes së akuzave. Sipas ligjit francez, personat e dyshuar për krime të rënda mund të mbahen në paraburgim deri në 96 orë përpara se të akuzohen.

 

Disa medie franceze, raportuan se burri i ndaluar në aeroport ishte gati të hipte në një avion për në Algjeri, ndërsa i dyti u arrestua më vonë gjatë së njëjtës ditë, Parisi. Të dy burrat, rreth të tridhjetave dhe të njohur nga policia, u morën në pyetje nën dyshimin për “vjedhje të organizuar dhe komplot kriminal”.

 

Radioja “France Inter”, duke cituar burime policore, raportoi se të dy ishin identifikuar përmes analizave forenzike të objekteve të lëna në vendngjarje, mes tyre një helmetë, mulli elektrik, jelek reflektues dhe sende të tjera.

 

Ministri i Brendshëm francez, Laurent Nuñez, shprehu “urimet më të përzemërta” për hetuesit, por kërkoi që të respektohen ligjet e fshehtësisë gjyqësore, në mënyrë që hetimet të mund të vazhdojnë pa pengesa.

 

Beccuau deklaroi të premten se më shumë se 150 mostra ADN-je, gjurmë gishtash dhe prova të tjera po analizoheshin në Paris dhe në laboratorë përreth dhe se ajo ishte “optimiste” për rezultatin e hetimeve.

 

Katër burrat kishin mbërritur jashtë muzeut më të vizituar në botë rreth orës 09:30 të mëngjesit të dielës së kaluar, me një kamion të vjedhur për transport mobiliesh, i pajisur me shkallë dhe ngritës mekanik. Të veshur me jelekë reflektues për t’u dukur si punonjës mirëmbajtjeje, ata thyen një dritare të pasiguruar dhe përdorën sharra rrethore për të hapur dy dritare, përpara se të zbrisnin me ngritësin dhe të arratiseshin me motoçikleta, të drejtuara nga dy bashkëpunëtorët e tjerë.

Operacioni zgjati më pak se 7 minuta, me dy hajdutët që hynë në galeri duke kaluar vetëm 3 minuta e 58 sekonda brenda saj. Gjatë arratisjes, ata rrëzuan një kurorë të stolisur me diamante dhe smeralde, por u larguan me tetë objekte të tjera të mbushura me gurë të çmuar.

 

Ndër sendet e grabitura ishin një varëse me smeralde dhe diamante që Napoleoni I i kishte dhuruar gruas së tij të dytë, Marie Louise, si dhe një diademë me 212 perla dhe gati 2,000 diamante, që dikur i përkiste perandoreshës Eugénie, bashkëshortes së Napoleonit III.

Nga muzika në politikë: Njihuni me kryeministren e parë grua që bëri histori në Japoni

by stoy

 

Japonia ka përjetuar një moment historik: më 21 tetor, parlamenti i saj zgjodhi kryeministren e parë grua në historinë e vendit. Sanae Takaichi, 64 vjeç, anëtare e Partisë Liberale Demokratike (PLD) të krahut të djathtë, tani i përket krahut konservator dhe e sheh Margaret Thatcher si modelin e saj. 

 

Megjithatë, në të kaluarën ajo ka qenë prezantuese televizive dhe dikur bateriste në një grup heavy metal. Dashuria e saj për muzikën rock dhe metal vazhdon edhe sot e kësaj dite. Ndër grupet e saj të preferuara janë Iron Maiden dhe Deep Purple.

 

Sot, ajo merr përsipër sfidën jo vetëm të udhëheqjes së një partie që po përpiqet të rifitojë besimin e votuesve pas një serie skandalesh, por edhe të një vendi me probleme ekonomike, shkallë të ulët lindjesh dhe tensione gjeopolitike.

 

 

Takaichi lindi në vitin 1961. Babai i saj punonte në zyrë, ndërsa nëna ishte oficere policie. 

 

Udhëtimi i saj politik filloi në vitet 1980, kur punoi në zyrën e demokrates amerikane Patricia Schroeder. Ajo vuri re se amerikanët shpesh nuk dallonin Japoninë nga vendet e tjera aziatike, duke e barazuar kulturën e saj me atë të Kinës apo Koresë. Përfundimi i saj ishte: 

 

“Nëse Japonia nuk e mbron veten, ajo do të jetë gjithmonë në mëshirën e perceptimeve sipërfaqësore të SHBA-së.”

 

Ajo kandidoi për herë të parë si deputete e pavarur në vitin 1992, por humbi. Në vitin 1996 hyri në Parlament, ku ndërtoi reputacionin si një nga zërat më të fortë konservatorë. Po ashtu, ka shërbyer në poste të larta qeveritare, më së shumti si Ministre e Punëve të Brendshme dhe Komunikacionit.

 

Siç tha së fundmi gjatë një vizite në një shkollë si pjesë e fushatës së saj: 

 

“Qëllimi im është të jem Zonja e Hekurt”, duke iu referuar qëndrimit të ashpër dhe të ngurtë politik.

 

Megjithëse zgjedhja e saj është një fitore për politikanet femra, ajo mbështet pikëpamje konservatore, për shembull, është kundër ligjit që lejon gratë të mbajnë mbiemrin e babait pas martesës, duke argumentuar se kjo minon traditën. Gjithashtu është kundër martesave homoseksuale.

 

Por kohët e fundit, Takaichi ka zbutur disi qëndrimet e saj. Ndër premtimet e fushatës janë përjashtimi i pagave të dadove nga taksat dhe ofrimi i lehtësimeve tatimore për kompanitë që ofrojnë shërbime kujdesi për fëmijët për punonjësit e tyre.

Ky qytet vendosi të ndalojë adoptimin e maceve të zeza: Shkak, Halloween-i

by stoy

 

Qyteti i Terrassas, në verilindje të Katalonjës, Spanjë, ka vendosur të ndalojë përkohësisht adoptimin e maceve të zeza nga strehimoret e kafshëve, si masë parandaluese kundër përdorimit të tyre në rituale ose praktika të dëmshme gjatë periudhës së Halloween-it.

 

Ndalimi është në fuqi nga 6 tetori deri më 10 nëntor dhe vlen për të gjitha kërkesat për birësim apo kujdestari të maceve të zeza. Sipas shërbimeve lokale të mbrojtjes së kafshëve, qëllimi i këtij vendimi është të mbrojë këto kafshë nga keqtrajtimi apo përdorimi i tyre si objekte “dekorative”.

 

Zëvendëskryetari i bashkisë, Noel Duque, deklaroi për transmetuesin spanjoll RTVE se çdo vit në këtë periudhë ka një rritje të ndjeshme të kërkesave për të birësuar mace të zeza.

 

Edhe pse nuk janë regjistruar raste të abuzimit në Terrassa, bashkia thotë se raste të tilla janë raportuar në zona të tjera, dhe paralajmërimet nga organizatat për mbrojtjen e kafshëve e kanë shtyrë qytetin të marrë këtë masë paraprake.

 

“Po përpiqemi të parandalojmë adoptimet nga persona që veprojnë impulsivisht, thjesht sepse është ‘në modë’. Në raste të tilla, të cilat e dimë se ndodhin, duam të shmangim çdo praktikë makabre,” u shpreh Duque.

 

Bashkia theksoi se ndalimi është një masë “e përkohshme dhe e jashtëzakonshme”, e ndërmarrë me synimin për të mbrojtur mirëqenien e kafshëve, dhe se nuk përjashtohet mundësia që masa të ngjashme të merren edhe në të ardhmen.

 

Gjatë periudhës së ndalimit, çdo kërkesë e veçantë për adoptim do të shqyrtohet rast pas rasti nga qendra e birësimit, ndërsa procedura normale e adoptimit pritet të rifillojë pas përfundimit të sezonit të Halloween-it.

 

Megjithëse në kulturën perëndimore macet e zeza shpesh lidhen me magji dhe supersticion, në kultura të tjera si Japonia dhe Egjipti, ato konsiderohen si simbole të fatit të mirë dhe begatisë.

Pas grabitjes në muzeun e Luvrit, zhduket edhe piktura e famshme e Picasso-s

by stoy

 

Një pikturë e Pablo Picasso-s, me vlerë 700 mijë dollarë, është zhdukur në Spanjë gjatë transportit nga Madridi në Granada.

 

Autoritetet kanë nisur një hetim për zhdukjen e veprës së artit të vitit 1919, me titull “Natyrë e qetë me kitarë” (Still Life with Guitar), me një lartësi rreth 12 cm.

 

Piktura, e njohur në spanjisht si Naturaleza muerta con guitarra, ishte planifikuar të ekspozohej në Qendrën Kulturore CajaGranada, si pjesë e një ekspozite të ardhshme.

 

Sipas zyrtarëve, vepra ishte dërguar nga një kompani transporti dhe mbërritja e saj në galeri ishte konfirmuar përpara hapjes së ekspozitës më 9 tetor. Ajo u zhvendos drejtpërdrejt nga furgoni i shpërndarjes në një ashensor mallrash, nën vëzhgim të vazhdueshëm me kamera sigurie.

 

Stafi i galerisë verifikoi paketimet e mbyllura, të cilat qëndruan të paprekura gjatë fundjavës. Megjithatë, kur kuratorët nisën hapjen e kutive të hënën në mëngjes, piktura mungonte.

 

 

Pamjet e kamerave nuk tregojnë ndonjë ndërhyrje të dyshimtë dhe nuk ka raportime për incidente gjatë transportit apo magazinimit. Policia e Granadës ka konfirmuar se vepra është shtuar në bazën ndërkombëtare të të dhënave për artin e vjedhur, megjithatë, ende nuk ka nisur një hetim ndërkufitar.

 

Humbja e kësaj vepre të vogël, por me vlerë të pamatë, sjell në kujtesë raste të tjera vjedhjesh të pikturave të Picasso-s në vitet e fundit, disa prej të cilave janë rikuperuar më vonë, si në Greqi dhe Belgjikë.

 

E realizuar gjatë periudhës pas-Kubiste të Picasso-s, “Natyrë e qetë me kitarë” konsiderohet një shembull i rëndësishëm i eksperimentimeve të tij me format abstrakte në fillim të shekullit XX.

 

Muzeu i Luvrit në Paris rihapet pas grabitjes spektakolare të bizhuterive

by stoy

 

Muzeu i famshëm i Luvrit në Paris është rihapur të mërkurën, tre ditë pas një grabitjeje spektakolare që tronditi opinionin publik dhe mori vëmendjen e mediave në mbarë botën. Hajdutët arritën të largoheshin me disa nga bizhuteritë historike mbretërore më të çmuara, të vlerësuara në rreth 88 milionë euro (rreth 102 milionë dollarë).

 

Pamjet e transmetuara drejtpërdrejt nga Reuters TV dhe media të tjera ndërkombëtare treguan vizitorët duke hyrë për herë të parë në muze pas grabitjes së ndodhur të dielën në mëngjes.

 

Grabitja është përshkruar nga autoritetet si e guximshme dhe e organizuar me saktësi deri në detaje. Sipas të dhënave paraprake, hajdutët përdorën një ashensor mallrash për t’u ngjitur në katin e sipërm të muzeut dhe më pas hynë në sallë nga një dritare. Grabitësit vodhën bizhutëritë në vitrinat që përmbanin disa nga sendet më të rralla dhe më historikisht të rëndësishme të Francës, përfshirë diadema, gjerdanë me diamante, safire dhe smaragde nga periudha e shekullit XIX.

 

 

Grabitja ndodhi brenda pak minutash dhe, pavarësisht masave të sigurisë, autorët u larguan pa lënë asnjë gjurmë. Autoritetet franceze kanë nisur një hetim të thelluar, ndërkohë që muzeu qëndroi i mbyllur për tre ditë rresht për të lejuar hetuesit të kryejnë ekzaminimet e nevojshme në vendin e krimit.

 

Muzeu është tani i hapur për publikun, ndërsa hetimet për identifikimin dhe kapjen e autorëve vijojnë.

 

Burgosja e ish-presidentit francez: Nga përqafimi me gruan tek akuzat për komplot

by stoy

 

Ish-presidenti francez, Nicolas Sarkozy, hyri të martën në burgun La Santé në Paris për të nisur vuajtjen e një dënimi me 5 vite burg, pasi u shpall fajtor për komplot kriminal lidhur me financimin e paligjshëm të fushatës së tij elektorale në vitin 2007 me fonde nga Libia, një moment historik që e bën atë ish-udhëheqësin e parë të Francës moderne që burgoset.

 

Sarkozy, 70 vjeç, u shoqërua nga qindra mbështetës teksa doli nga banesa e tij në Paris, dorë për dore me bashkëshorten, Carla Bruni-Sarkozy. Ai e përqafoi atë para se të hipte në makinën e policisë.

 

Pak minuta më vonë, automjeti kaloi portat e burgut famëkeq La Santé, ku Sarkozy do të vuajë dënimin në izolim të plotë.

 

Dënimi dhe apelimi

Sarkozy u dënua muajin e kaluar për përfshirje në një komplot kriminal që kishte për qëllim financimin e fushatës së tij presidenciale me para të ardhura nga regjimi i Muammar Gaddafi në Libi. Ai ka kundërshtuar si vendimin e gjykatës, ashtu edhe burgosjen e tij para përfundimit të procesit të apelimit. Avokatët e tij deklaruan të martën se kishin paraqitur menjëherë një kërkesë për lirimin e tij të përkohshëm.

 

Akuzat për komplot

 

“Është një ditë e zymtë për të, për Francën dhe për institucionet tona, sepse kjo burgosje është një turp,” deklaroi avokati i Sarkozy-t, Jean-Michel Darrois, para gazetarëve.

Gjatë rrugës për në burg, Sarkozy publikoi një deklaratë në rrjetet sociale ku u shpreh se “një njeri i pafajshëm” po burgosej.

 

“Do të vazhdoj ta denoncoj këtë skandal gjyqësor,” shkroi ai. “E vërteta do të dalë në pah.”

Në një intervistë për gazetën Le Figaro, ai tha se do të merrte me vete në burg tre libra, numri maksimal i lejuar, përfshirë romanin “Konti i Monte Kristos” të Alexandre Dumas, ku protagonisti arratiset nga burgu për të kërkuar hakmarrje, si dhe një biografi të Jezu Krishtit.

 

“Nuk kam frikë nga burgu. Do ta mbaj kokën lart, edhe përpara portës së La Santé,” tha ai më parë për La Tribune Dimanche. “Do të luftoj deri në fund.”

Sarkozy ka përsëritur vazhdimisht se është viktimë e një “komploti” të organizuar nga individë të lidhur me qeverinë libiane dhe e ka cilësuar vendimin e 25 shtatorit si një “skandal”.

 

Izolim i plotë

Avokatët e tij kanë bërë të ditur se për arsye sigurie, Sarkozy do të mbahet i izoluar nga të gjithë të burgosurit e tjerë. Ai kishte përgatitur një çantë me disa triko për shkak të të ftohtit në burg dhe tapa për veshët për shkak të zhurmës.

Christophe Ingrain, një nga avokatët e tjerë, e cilësoi vendimin si “një padrejtësi të rëndë”.

 

“Është një moment shumë i vështirë, por presidenti ka qëndruar i fortë,” tha Ingrain. “Nuk është ankuar, nuk ka kërkuar asgjë, as ndonjë trajtim të veçantë.”

Sipas tij, izolimi i plotë nënkupton se Sarkozy nuk do të ketë kontakt me të burgosur të tjerë dhe do të kalojë shumicën e kohës i vetëm në qeli. Ai do të lejohet të dalë në oborr për një orë në ditë dhe të ketë deri në tre vizita në javë nga familjarët.

Avokati shtoi se Sarkozy ka ndërmend të shkruajë një libër mbi përvojën e tij në burg.

Grabitje në 7 minuta: Vidhet koleksioni i bizhuterve në muzeun e Luvrit

by stoy

 

Disa persona hynë përmes një dritareje në Galerinë Apollo, vendi ku ruhen stolitë mbretërore franceze dhe morën objekte me vlerë, duke shënuar një ndër vjedhjet më të bujshme në muze.

Sipas ministrit të Brendshëm francez, Laurent Nuñez, grabitja zgjati vetëm shtatë minuta. Hajdutët përdorën një pajisje prerëse për të çarë vitrinat e ekspozitës, duke marrë bizhuteri të çmuara përpara se të largoheshin me motoçikleta.

Ata synuan dy vitrina me siguri të lartë që përmbanin bizhuteri nga koha e Napoleonit. U vodhën gjithsej nëntë objekte, një prej të cilave u gjet pranë vendit të ngjarjes, sipas autoriteteve vendase. Bizhuteritë përfshinin mijëra diamante dhe gurë të çmuar me vlerë të jashtëzakonshme.

Sipas Ministrisë franceze të Kulturës, ndër objektet e vjedhura ishin: një diademë, një varëse dhe një vath që i përkisnin setit të safirit të Mbretëreshave Marie-Amélie dhe Hortense. U morën gjithashtu një varëse dhe një palë vathë me smerald dhe diamante nga koleksioni i Perandoreshës Marie-Louise. Hajdutët grabitën edhe një brosh me diamante dhe diademën e Perandoreshës Eugénie, e cila përmban mbi 200 perla dhe gati 2,000 diamante.

 

 

Autoritetet thanë se autorët tentuan të merrnin edhe kurorën e Perandoreshës Eugénie, bashkëshortja e Napoleonit III, por ajo u gjet e dëmtuar pranë vendit të ngjarjes.

Fotografi të mëparshme tregojnë setin e bizhuterive të Mbretëreshave Marie-Amélie dhe Hortense në vitin 2020, pjesë nga të cilat u vodhën gjatë grabitjes.

Muzeu deklaroi se objektet e vjedhura kanë një vlerë të pallogaritshme trashëgimie dhe historike, përtej çdo vlere tregtare.

Presidenti francez Emmanuel Macron shkroi në rrjetin X:

“Grabitja e kryer në Luvër është një sulm ndaj trashëgimisë dhe historisë tonë.”

Personat që ndodheshin brenda muzeut më të vizituar në botë u evakuuan, ndërsa institucioni u mbyll për pjesën tjetër të ditës për të ruajtur provat.

Ministri Nuñez deklaroi për radion France Inter se objektet e vjedhura kishin një vlerë “të paçmueshme” dhe se grabitja ndodhi “shumë, shumë shpejt.” Sipas tij, autorët hynë nga jashtë përmes një dritareje, duke përdorur “një platformë të ngritur, të vendosur mbi një kamion.”

Këta ashensorë mekanikë përdoren gjerësisht në Paris për të transportuar mobilie në katet e sipërme të ndërtesave.